الناس الغلابه قوي

الناس الغلابه قوي

بيقولوا في الامثال هم يضحك و هم يبكي

اثناء دراستي في الكليه وجدت المثل ده و بوقوه

كان فيه ماده في الكلي اسمها تخطيط عمراني ... كان الشغل فيها عملي و هي اعادة تخطيط مناطق عشوائيه بننزلها و نتكلم مع اهلها
وهناك اتعاملت مع الناس الغلابه قوي

مواقف صغيره ممكن تضحك ساعتها لكن لو فكرت فيها تلاقيك هتبكي و بشده

يعني يمكن تقولوا و هو البكا مكانه الضحكه
لكن اجمل الضحك هو الي يثير تفكيرك و ينتهي بدمعه

و المثل بيقول ا بخت من بكاني ....

الحلقه الاولى 

-----------

بابي من عند الجيران

كان يا مكان كان فيه مكان في احسن مكان

حكر - لفظ حكر بيطلق على مكان وضعت عليه يد الافراد بقوه - مكانه عالنيل في احسن مكان فيك يا نيل

سكانه غلابه قوي
و كان المشروع الي عندنا اعادة تخطيط هذه المنطقه

سلام عليكم يا ريس
و عليكم السلام و رحمة الله و بركاته - خير يا خوانا
احنا طلبه في هندسه و عندنا مشروع عشان نصلح المنطقه هنا

نظرة شك

طلبه و لا صحافه ااه مانا فاقسكم كنا قاعدين هنا كافيين خيرنا شرنا لحد ما كتبتوا عننا بت يا شاهيناز روحي نادي المعلمه امك يا بت

بخوف شديد
لا والله احنا طالبات حتى كرنيهاتنا اهووو

كارنيهات ايه ياموا كارنيهات مانتوا وصلين و تعرفوا تعملوا كل حاجه

طبعا لعنا غبائنا الي خلانا نرووح بنات لوحدنا - قال مساواه قال بلا نييييييييييييله -

تيجي المعله ام شاهيناز الي نكتشف انها عماره ماشيه لوحدها من غير اوناش و نتخض طبعا من هذا المنظر
و تبص للكاميرا بشك

نشرح ليها الموقف و تبتسم
واللهم شكلهم غلابه يا حاج مرقس !

اه والله احنا غلابه قوي قوي

طيب ياختي انت و هي عايزين ايه

احنا كنا بنلم بيانات عشان تطوير المنطقه يعني ندخلكم ميه و نور - طبعا منقدرش نقول ان المشروع اننا نشيل المنطقه خالص و الا تعلق رؤوسنا على باب الحكر كما علقت راس طومان باي على باب زويله -

طيب يبقى تتفضلوا معايا تشربوا الشاي و احكيلكم على كل حاجه

تدخل معانا البيت و احنا نبسمل و نقرا المعوذتين و نلعن دكاترنا الي حاطونا في التدبيسه دي و نضرب نفسنا بال... فل و ياسمين على دماغنا الي اصرينا اننا بميت راجل و لا نحتاج اولاد بالمجموعه
ملاحظه : كان معانا ولد واحد فرض علينا من الدكتور و خاف يدخل الحكر

ده بيتك يا حاجه

لا ده بيت ام باكينام ( الاسامي هنا حقيقيه على فكره )

علامات استفهام كتييييررررررر قوي
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ظ

ندخل البيت و لحد اوضه النوم و نشوف ام باكينام نايمه ...
طبعا احنا هس و مستغربين
وبصراحه مرعوبين
ولحد دلوقت لا اعرف الجرأه الي خلتنا نروح الحكر او نطلع البيت معاها

كان مطمنا شويه اننا 11 بنت

تمصمص ام شاهيناز شافيفها و تقول
ياحرام مسكينه اصلها شغاله لبيسه لرقاصه فبتسهر طول الليل و تنام طول النهار يالله بينا


طبعا احنا مستغربين احنا دخلنا لحد هنا ليه هي ناويه تكتشفنا و لا حاجه لنسيبنا من مجال الهندسه و نخطوا لمجالات الفن الراقي !!!!!

يالله بينا على فين يا حاجه
يالله بينا على بيتنا

بصينا باستغراب و نحن نرى ام شاهيناز تقفز من الشباك- الي على ارتفاع دورين بالمناسبه - الي سقاله خشب رفيعه جدا تصل الشباك بشباك البيت المقابل

ورغم حجم ام شاهيناز الا انها كانت تتحرك بخفه شديده على هذا الحبل الخشبي يحسدها عليها لاعبي السيرك القومي
و في رعب شديد حصلناها و انا اتذكر مشهد فؤاد المهندس في مطارده غراميه لما المضيفات يطيروا من فوق النخله و تمنيت اني اطير عالبيت

في هدوء و بدون الدخول في تفاصيل الاسئله
اكتشفنا ان ام شاهيناز سلم و سقف بيتها واقع فهي تستظل بسقف صفيح

و تضطر ان تدخل بيتها من عند الجيران عشان معهاش فلوس تبني سلم و السلالم الخشب متطلش شباكها زي الدور الي تحتهم ما عمل

اكتشفنا ان ام شاهيناز من اطيب مخلوقات الله و دمها خفيف جدا تعمل خادمه لدى احد الاثرياء و عشان كده سمت بنتها على اسم السيده صاحبة البيت تبركا - يمكن بنتها تسعد زيها -

وبجد كانت قاعده حلوه
وربنا ستر معانا و حرمنا نقول مش عايزين ولاد في المجموعه - مؤقتا فعندما وصلنا الكليه عرفنا ان المجموعه المنافسه الي كلها صبيان واحد اتكسرت ايده و التاني خد مطوه في وشه وهكذا عرفنا ميزة كوننا بنات



بس خلاص اضحكوا علينا و عالي عملناه في نفسنا


نسيت اقلكم الحكر ده تمت ازالته واتبنى مكانه فندق فخم جدا


يا ترى رحتي فين يا ام شاهيناز

---------------------

الحلقه الثانيه

 ---------

هنهد الضريح

تم توزيع مشاريع الرفع عالمجموعات - ايه هو مشروع الرفع
هو عمل رسومات هندسيه كامله لاثر ما لم يتم رفعه من قبل او توثيقه

وكان من نصيب مجموعتنا - بما اننا مجموعة البنات فقط الي غايظه الدكتورديما - ضريح لاحد احفاد الرسول عليه افضل الصلاة و السلام

كان الوصف المبدئي للضريح الي حصلنا عليه انه مبني بالحجاره المزينه بنقوش محفوره في الحجر و قبه مميزه جدا من النحاس صبت كقطعه واحده و زينت من الداخل بنقوش اسلاميه محفوره و ملونه و غطيت من الخارج بالجص - زي الجبس كده

طبعا كنا منتظرين نروح و نشوف تحفه معماريه ملهاش حل

اولا نسيت اقلكم مكان الضريح انه قرب مقابر الخليفه بعد مسجد ابن طولون للداخل بمسافه كده

روحنا و يا ريتنا ما روحنا
لقينا خير اللهم ما اجعله خير الدنيا اخضر في اخضر

مش بهرج بالفعل
الاثر مسجل و لكن لا يلقى اي عنايه من هيئة الاثار ككثير من الاثار الاسلاميه حتى عهد قريب
وهكذا قرر الناس هناك انهم يحافظوا على هذا المكان التراثي و يجددوه على حسابهم وهكذا تم دهان كل شئ باللون الاخضر و تم توسعة المكان

المشكله بقى في تعامل الناس معانا
فقد اصبح الشك في اي شخص يدخل عليهم من العالم الخارجي الي عالمهم المغلق عليهم هو شخص مشكوك في امره و نيته الاذى و بس
و هكذا طلعت علينا اشاعه جامده اننا جايين نهد الضريح عشان الناس تطفش و يسيبوا المكان
ومعرفش مين اوحى للناس بهذه الفكره النتيجه كل مره نروح نتحدف بالفل و الياسمين وزي الافلام المطره من الشرفات تمطر علينا مياه الغسيل

وفي يوم كده و احنا بنرسم اكتشفنا ا ننا مش عارفين قطر القبه و الي موجوده على حافة المبنى و هكذا عملنا قرعه على مين الفدائيه الي هتلف حولين القبه و للاسف طلعت انا و مش بقرعه فانا الوحيده الغير محجبه في ذلك الوقت و المرتديه بنطال و بكده طلعت فوق القبه الف حوليها

وانا ماشيه على سير رفيع ميجيش عشره سم وماسكه الشريط في ايدي و واخده القبه في حضني و مش عايزه ابص تحت من الخوف
واذا بشباك الجيران يفتح و تطل منه سيده تزعق فيه
عايزين تهدوا القبه ليه يا كذا و كذا

واذا بصندوق الزب..... يدلق فوق نافوخي و انا في هذا الوضع لا استطيع التحرك لا يمين و لا شمال ومضطره اكمل التضحيه الكبرى بتاعتي و انا بلعن الي فكر في موضوع المساواه بين الجنسين و انا مال انا و مال الشقلبظات دي

المهم روحت البيت اتنقعت في كلور لمدة يومين
ولما رجعت الكليه عرفت ان الدكتور معجبوش الي حصل قال ذنبنا احنا
قام كافئنا و ادانا اثر تاني مسجل برضه
المره دي في المدبح و اسمه الحمام الفاطمي
قعدنا ندور ندور عليه و في الاخر اكتشفنا ان جبل الزباله الي قصادنا ده يغطي الاثر

او بقايا الاثر

احد الكبار قوي قررت ان الارض دي ارضها و ان البيت القديم الي الحكومه فرحانه بيه مالهوش لازمه و لازم يختفي - مكنش المدبح اتنقل لكن القرار كان اتعرف داخليا و اتعرف ان المنطق هيعاد تخطيطها -
وهكذا احيط المبنى في غضون اشهر بجبل - مش مبالغه لما تعرف ان هذا الجبل ارتفاع عماره تسع ادوار - زبااااله
و من جوه بيتم هد الاثر حته حته
مكنش باقي فيه لما روحنا غير المستوقد بتاعه
و كالعاده التعامل بشك رهيب معانا

و عمري ما شفت كمية لمون زي الي اتحدفت بيها اليوم ده

الحلقه دي متضحكش و بصراحه ابتديت اشك ان الموضوع مكانه الضحكه

بس فكروا معايا في الي حصل

الناس الي مش لاقيه تاكل تدفع من قوتها و تحاول تحافظ على حاجه الحكومه مش داريه بيها رغم ان بفكرهم الضيق بوظوه

و الناس الي لاقيه تاكل هدت مبنتش


و ليه الشك فينا ده غلط مين  

 

**********************

 

الحلقه الثالثه 

------------

 

الميه تروي العطشان ... لو كانت ميه

في مكان ما في وسط القاهره
في حي من اقدم احيائها
المطربين تغنوا بيه ....
حي شبرا العتيق

نزل لينا بحث عن دراسة تأثير نقل سوق روض الفرج من المنطقه على الناس و منطقة الدراسه من عند السبتيه مركز شباب رو الفرج لحد عمارات اغاخان طولا و لحد شارع شبرا عرضا

كنا قاعدين بنلف واحنا بنملى استمارات لحصر لها
طبعنا اتشحورنا و اتسحلنا مشي المفروض اننا نلف على بيت بيت في المنطقه دي

( اكتشفنا اننا العبط الوحيدين و باقي المجموعات راحت جابت البيانات من مركز التعبئه و الاحصا و كنا اقل المجموعات درجه عشان بيانتنا مطلسقه و مش مطابقه !!!!!!!!!!!!!!!!!!!!!!)

في اليوم ده تنفخنا بيبيسي و كولا و ميراندا و كل المشروبات الغازيه المعروفه و غير المعروفه
فما ان نخبط على باب - مترزعش في وشنا و نالنا نصيب من قصائد الشعر اياها - حتى تفتح لنا ست الدار و تبعت الواد بليه يجيب ازازه الحاجه الساقعه عشان احنا غلابه و الاساتذه دول مفتريين انهم يشحططوا بنات زي الورد زينا

بالمناسبه في اكتر من بنت معانا جالها عريس عن طريق الواد ابني مغلبني مش لقيلاه عروسه تعجبه
ثم طبطبه على الركبتين - من باب الاختبار - و طبطتين على الضهر - واضح ان موديل ماري منيب في الاختبارات العروسيه منتشر-
غالبا كانت المناطق الشعبيه قوي هي الي بنقابل فيها بترحاب اما المناطق المتوسطه فنظرة شك قاتله و كلمتين من عالباب في حين المناطق الهاي فدول في الباي باي منقدرش ناخد منهم معلومه يبصولك بقرف و يقفلوا الباب في وشك ده لو اهل البيت هما الي قابلوكي مش صرفوكي عن طريق الخادمه
كمان بتوع المحلات عندهم هسهس من بتوع الضرايب يفضل عنيه مدبوبه انت بتكتبي ايه

غير لما بيسلطوا عليكي عيل يخطف منك الورقه و يجري و بعدين ترجعلك بابتسامة - قال ايه خجل - ويقلك معلش اصل الواد كان بيلعب طبعا بعد ما يتأكدوا ان اسمهم مش مكتوب

نرجع بقى لمشكلة الترحاب الزائد
المشكله بقى مش في الحاجه الساقعه المشكله في الشاي
الشاي بكل انواعه - شاي فتله شاي صعيدي
وفي احد المناطق دي شربت كباية الشاي الي مش هنساها في حياتي

الست قابلتنا بكل ترحاب و عزمتنا ندخل و حسينا الدار امان البيت اصلا مفتح من كل حته ودور ارضي وولادها كلهم عيال مقاريض كانوا بيلعبوا قدام الباب غير اننا مجموعه المره دي معانا ولد

حسينا اننا داخلين بيت جحا
صاله مترين في مترين بيفتح عليها اوضتين واضح انهم نوم و مطبخ مقاس واحد سم في واحد سم

ومع ذلك اتفرجوا على جواهر الملك سليمان دهب ياقوت مرجان

اتنين تلفزيون من احدث موديل في ذلك الوقت
تلاته دش واحد العادي وواحد بتاع الاوائل وواحد بتاع مش عارفه ايه
عدد واحد تلاجه و ديب فريزر
بوتجاز خد نص المنطبخ و الست واقفه بره المطبخ عشان تعرف تستخدمه
طيب ايه المشكله ما شاء الله الله اكبر في عيني ربنا فاتح عليهم

المشكله لما جت تعمل الشاي
بصينا لقينا كوز مصدي اتمد في صفيحه - كنت فاكراها صفيحة حاجه تانيه - طلعت بتاعت ميه الطحالب الخضرا و البني منتشره عليها من كل حته ثم ادلق هذا الكوز جوه البراد الشيك ابو صفاره

بصينا لبعض و احنا بنفكر ازاي نخلع العمر مش بعزقه
مشكله هؤلاء الناس البسطاء انك مينفعش ترد ليهم عزومه تبقى اهانه كبرى في حقهم بتتاخد يا اما انت مستكبر عليهم يا اما شايف انهم مش هيقدروا يعزموك - عزة نفس عجيبه بالفعل

بالتالي لازم نشرب و قد كان شربنا كوباية الشاي ام طحالب و حاجات تانيه بلاش اقلها

الي عرفناه ان الميه قاطعه عن المنطقه من شهور و انهم اتنبح صوتهم في الموضوع ده ساعات بيملوا من حنفيه عموميه و لما بتتقفل عليهم لجأوا للميه الي محدش يقدر يمنعهم عنها مية النيل القريبه منهم جدا بالمناسبه

قمة التناقض الي في الدنيا
رفاهيات يمكن لا تتواجد في بيوت ناس مقتدره مع افتقاد شئ اساسي جدا
وده في وسط وقلب القاهره لا هي عشوائيات و لا كلام معرفش ايه

وعجبي
******************************************

 

الحلقه الرابعه

----------

العيال كبرت

عوده لام شاهيناز

اكيد يعني مكنتش ام شاهيناز هي البيت الوحيد الي زرناه فالحكر رغم مساحته ليست بالكبيره فهي ليست بالضيقه ايضا

كنا بعد مقابلة ام شاهيناز ابتدينا نتفائل خير الناس هنا مش وحشه و عادي ممكن نجمع لبيانات و نروح على بيتنا و احنا معززين مكرمين

في رحلة الرجوع عن طريق بيت ام باكينام - فكرينها و لا - كانت استيقظت من كتر الدب - ما هو واحنا رايحين بنبقى بنتسلق الشباك من غير صوت لكن و احنا راجعين بنط
تخيل 11 دبه فوق دماغك و انت نايم و هي متعوده على دبتين دبة خالتنا ام شاهيناز و دبة شاهيناز
وهكذا استيقظت لتبدأ مرحلة س و ج عن احنا مين و نقاش عريض بين السيدتين عنا واضح ان ام باكينام مش مرحبه و نظرات الشك العميقه باينه جوه عينها
المهم في الاخر جه سؤال مهم جدا
هو انتوا ناويين تكملوا لف لوحتدكم يا اموره انت و هي ... و لما جه جوابنا بالايجاب رنت حتة دين ضحكه - احممممم بلاش نوصفها فقط استحضروها في اذهانكم من الافلام العربي القديمه
ياختي انت و هي دا انتوا لقطه ... الحكر هنا يا حبيبيتي فيه و لا 100 واحد هارب من احكام منهم تلتين واحد عالاقل هارب اعدام
شكرااااااااااااااااااااااااا جدااا

طبعا المعلومه البسيطه الصغننه خالص دي الي اغفلتها ام شاهيناز نشفت الدم في عروقنا
لكن لازم نكما البحث لزوم العلم والدكاتره الله .... يعمر بيوتهم

و هكذا تقرر اننا نمشي في حمايه
وهذه الحمايه هي شاهيناز و باكينام و شله من اصاحبهم
بالمناسبه اكتشفنا ان باكينام ولد
زي ما بيقولوا في الامثال الجيره غيره و هكذا ازاي ام شاهيناز يكون عندها بنت اسمها الافرنكه و ام باكينام لا - هذه الحكايه على لسان شاهيناز الصغيره
وبصراحه مش فاكره اسامي بقيت الطفال و لكن كتير منها على هذا المنوال

يعني موضوع حكشه و بليه و الكلام ده واضح انه موضه قديمه او ممكن هي دي الاسامي دلوقت في الزمالك و المهندسين و جاردن سيتي اسفه ايه الاحياء الشعبي دي ... اقصد المنصوريه و طريق مصر اسكندريه و احياء الفل و الياسمين بالقاهره الجديده

شاهيناز بنت رقيقه عسلية العينان شعرها طويل سايح لحد و سطها عندها تسع سنين تشوفها تقول ملاك الي ان تتكلم
قعدنا ندردش معاها و كان من الاسئله
انت بتروحي مدرسه يا شاهي
البنت استمخت من اسم الدلع و ردت : اااه يعني لما بحب كده بعدي اشوف خدوا ايه
طيب ليه مش رحتي النهارده هو انت مش شاطره
بصت للبنت الي سألت بصه - الحمد لله مش انا - كأنها بتقولها انت عبيطه يا بنتي و ردت انا مبعرفش اقرا قوي بس اهو ست المس بتيجي تكتب لينا الاجابات كل امتحان
اصل انا مظبطاها و باخد عندا مجموعه ( ياواد يا جامد)
طيب انت مش خايفه و انت بتتحركي معانا يا شاهي مانت عارفه ان فيه ناس شريره
احنا من جوه الحكر يا ست الابله و لو حد قرب مننا بتوع الحكر ياكلوه و لو حد من المدرسه غلس عليا انا ممكن اطلعله دي
و دي سكينه مطبخ ما شاء الله من الي بتستخدم مع الاكياس


الحقيقه سكتنا خاااالص و اتأكدنا اننا فعلا في حمايه اقوى من حماية الشرطه

وكان حديثنا لساعات بعد رجوعنا الكليه بالضحك عن البنت المسترجله الي اسمها شاهيناز و الولد الي اسمه باكينام

بس دلوقت انا بسأل نفسي
هو ايه الي كان يضحك

ولا حاجه

 

ا****************