Saturday, May 11, 2013
الحلقه 11
أي أم بتحب تغني لأبنها وهو بينام أو عشان تسكته من العياط معرفش ليه العاده دي تقريبا دي حاجه متوارثه في دمنا من ساعة الفراعنه
كلمات غريبه دارجه على لسانا الغريب انها بتهدي الطفل و بينام معاها ...وهموت و اعرف معناها ... يعني ليه لما يضحك لازم نقله "كغه " وهو بينام نقله "نينه هوو"
المهم ان ذوق ابني في الاغان مختلف تماما عن الباقيين ...طول عمره فلته و عبقري مش ابني حبيبي ..... في الاول جربت معاه كل اغاني الاطفال من اول ذهب الليل لحد مكامكا و ابدا لا يستجيب ليهم على الاطلاق معرفش ليه واضح ان ابني ودنه مش موسيقيه – او اغلب الظن انه مش معجب بصوتي و عايزني اعتزل بدري
في يوم كان عمال يعيط بدون سبب – او اغلب الظن السبب انا لسه مكتشفتوش- قعدت اجرب معاه كل وصفات السكات من هز و اغاني و هزهزه و اعمل اصوات غريبه من درجن درجن لحد الكلمه الي اسماعيل ياسين معرفش يكتبها للخواجه بيجو و اذا به صوت واحد بس هو الي يلفت انتباهه و يسكت ...تيكا تيكا .. تقولولي ايه تيكا تيكا دي اقلكم معرفش اهي حاجه طلعت ساعتها وخلاص و بقى بيسكت معاها و كمان يكركر بالضحك
وهكذا تركت ثوب المطرب و اخدت ثوب الملحن و قعدت الحن تيكا تيكا بكافة الاشكال و النغمات و هو يضحك معاها و المهم انه ديما يضحك منها مهما كان شكل اللحن المهم ان انا اقول تيكا تيكا
اظرف حاجه كمان انه لما يشوف حد غريب يعيط و لكن اول ما اقول للزائر اقله تيكا تيكا كده يبقوا صحاب و يسيبه يلاعيه و خلاص قال كلمة السر و بقى من العيله
فضلت معاه تيكا تيكا دي لحد ما في يوم بالصدفه كنت مشغله شريط هشام عباس و اذا به مع اغنية هشام عباس طول مانت بخير يبتسم و يتكسف !!!!! طيب يبتسم ماشي يتكسف ليه معرفش
وهكذا انضم هشام عباس للتيكا تيكا و ارتديت ثوب المطربه تاني
كان معكم من امام الميكرفون المطربه الصاعده ام زئرد
Subscribe to:
Post Comments (Atom)
No comments:
Post a Comment