وجاء زئرد

الحقيقه ان تجربة وصول زئرد كانت تجربه غريبه جدا ... بيقولوا ان اغلب الستات في الوقت ده بيحسوا بالقلق و الحقيقه هو مش قلق هو رعب ...رعب ساعات بيشل النفوخ عن التفكير الصح و هتشوفوا الرعب عمل فيا و فيه ايه
استعداد لقدوم سيادته اصر زوجي على نزولي مصر و المكوث عند والدتي لترعاني في الشهور الاخيره و رغم اعتراضاتي الناتجه عن حبي الشديد ليه – و رعبي من ركوب الطياره بصراحه- نزلت مصر لاستقبل استقبال الفاتحين الابطال . و اقيم مع ست الحبايب لمدة شهرين ،البيت كله منتظر في قلق وصوله تقلش منتظرين زيارة السيد الرئيس
و زاد القلق مع تأكيد الدكتور احتمالية أنه يوصل قبل ميعاده و بالتالي عشت حملة دلع ايه ملووووووووكي ...اااه كانت ايام يا ريتها ترجع تاني
كنت اي تكشيره اختي تنط فوق دماغي و تقلي مالك و لو زعلت و هي من النوع الي مش بتسأل في حد الاقيها جتلي و تبوس راسي و تقلي متزعليش ... وبعدين تقلي يالله ادينا مستحملينك عشان زئرد عارفه لو مطلعش شبهي بعد كل ده هرميكي انت وهو من الشباك

ده غير ماما و حملة تزغيط البط ( مش البط الي بيتزغط انا الي بتزغط البط) و لا حياة لمن تنادي اني مش محتاجه الاكل ده كله تتقلب بقمصه و زعل و انا مقدرش على زعل ست الحبايب – بيني و بينكم انا كمان كان وحشني اكل ست الكل بعد شهور في الغربه واحلى حاجه انك تاكل الاكل من غير ما تتعب فيه

وجاء يوم ووصوله ..كنت مررت بعدة تجارب من الالم من قبل كل مره اظنها ساعة الولاده ثم تتضح انها انذارات كاذبه و بالتالي عندما شعرت بالالم هذا اليوم لم اعطيه انتباهي ... اهو زي كل مره ... اكملت محادثاتي مع زوجي على النت و كل شويه احس بالالم و اطنش و انا مش مستوعبه ان دي اشارات قدوم بسلامته... زاد الألم بطريقه ابتديت اشك بها !!!!!! هو مستمر منذ اكثر من ثلاث ساعات حتى الان و اصبح متكرر كل ربع ساعه !!!!!!!!!!!
ذهبت على استحياء و انا مكسوفه اصحي ماما بعد نص الليل كده و يطلع الموضوع بمبمه زي كل مره و اقلها " ماما أنا شكه اني بولد" من هدوئي امي لم تعطي الأمر أهميه في اوله و سألتني و هي تتثائب و تستعد للرجوع للنوم ليه
قلتلها اصل فيه وجع كل ربع ساعه
انتفضت امي وصرخت "بتقولي كل قد ايه و كنت بتعملي ايه قبل كده مقلتيش من بدري ليه" ...رديت بمنتهى البرأه اصل كنت قاعده على النت بكلم ابو زئرد و ننقي هديه سوا لقريب له
تقريبا ماما كده كانت عايزه تخبطني بحاجه في راسي و ترتاح وكويس قوي ان ابو زئرد مكنش قدامها في الوقت ده .... المهم ادتني الموبيل و قالتلي طيب كلمي الدكتور حالا عقبال ما اصحي اخواتك
و قامت بايقاظ اختي لتجهيز الشنطه و مكالمة اخي ليعود من عمله الليلي
كلمت الدكتور الي طبعا اتخم من هدوء صوتي و سألني هو وجع جامد يعني قلتله لا هو انا مستحملاه قالي طيب لو استمر للصبح كلميني و تعالي على المستشفى – بيني و بينكم ما صدقت انا كنت خايفه قوي بتلكك و عايزه اهرب تقوللي في حد يعمل كده اقلكم معرفش بقه
رحت اطمن ماما و انا بضحك و قلها بس بس طلعت بمبمه الدكتور قالي تعالي بكره انا داخله اناااا اااااااااااااااااااااه ... الالم قطع جملتي و اصرخ بعدها هو الولد بيرفص جامد كده ليه النهارده !!!!!!!!!
قام السيميائي بمكالمة الدكتور و شرح له الوضع على حقيقته فإذا بالدكتور يصرخ مستغربا برودي و يأمر بنقلي على المستشفى فورا و أنا أحاول اقناع والدتي ان الصباح رباح و مش ممكن هننزل الساعه تلاته بليل من البيت كده ... بس مقتنعوش بكلامي معرفش ليه ... ااااااااااااااااااااه بطل يا واد رفص خليني اكلم جدتك – نزلت من البيت بزفه امي واخي السيميائي واختي القلوقه ومعرفش ليه سواق التاكس لما شاف منظري ساق بسرعة ميه وعشرين وكسر تلت اشارات – كان هاين عليا اقله براحه يااسطى مستعجل ليه بس زئرد كان نازل رفس مش عارفه اتكلم منه كلمتين
المهم نزلنا و قام الدكتور بالكشف و انا ابتسم و اقول له من تحت اسناني – هتقولي اروح و اني بدلع صح – ااااااااااااااااااااااااااااااااااااااااااااااه
لا بقى الولد زودها قوي مش ممكن كده مش عارفه اتكلم كلمتين بجد بس لما اشوفه هردله كل رفسه فيا ده
بصلي الدكتور بغيظ وهو مش لاقي كلام يقوله وقام بادخالي حجرة العمليات فورا لانقاذ زئرد وانا فوق البيعه
و هنا داخلني الخوف عليه