وجاء زئرد الحلقه الرابعه

ابتدى الجدال تاني كنت فاكره اني هرتاح من موضوع الاسم ده بعد الولاده فإذا بي وقعت في مشكله أكبر
يا ريتني حسمت الموضوع و أنا وزوجي لوحدنا لكن كده انا وقعت لوحدي بين المطرقه و السندان
كل شويه هتسميه ايه هتسميه ايه
في البدايه حاولت استغل غياب زوجي و استفرض بالواد و اسميه على مزاجي
طيب والله كنت مختاره شوية اسامي حلوه
ايه رأيكم في وضاح ... وحش الاسم ده – ده حتى اسم لعيب قوي أوي في فريق كابتن ماجد – ده انا من ساعة ما سمعته وانا بتفرج على الكارتون ..احممم عادي يعني ايه ... وانا حبيت الاسم ودورت على معناه فعجبني
معناه صبيح الوجه المبتسم دائما شديد الوضوح كاره للنفاق .. طيب مش بذمتكم اسم زي السكر
بس بقى تقولوا لمين قامت الدنيا و مقعدتش
وامي لما تمسكها القريحه الشعريه في التريقه محدش بيقدر عليها – تقلي اسم وضاح محتاج ايضاح – وضاح قاعد في الارض بانبطاح .. بتجيب السجع ده منين معرفش
قررت اغير الاسم فاخترت مجد الدين او صفي الدين و برضه خناق على الاسم من الناحيتين و حماتي تقلي ماله محمد على اسم جده و ماما تقلي ماله محمد على اسم خاله
اول مره اشوف ام وحمه يتفقوا و يجوا و يتفقوا عليا انا
بقيت بقول فينك يا ابو زئرد تيجي تلحقني .. و الايام بتجري وكل واحد يسألني هتسميه ايه اريح نفسي و ااقلهم منتظره ابوه يجي يسميه، ابتدت المكالمات بيني و بينزوجي العزيز لحسم موضوع الاسم وهو برضه مش راضي بالاسامي الي بختارها وهنا قررت اللجوء لعقدة الذنب بقى ... يعني هو انت سايبني لوحدي في الشهور الاخيره وكمان بعد الولاده وانا تعبانه قوي ومش راضيه اقلقك ( كنت زي القرده) وكمان لما اطلب منك طلب صغير زي اني اختار اسم الولد مش عجبك ...و مره تانيه نكد واقفل السماعه بقمصه لحد ما نلت ما اريد ..............
بس خلاص اخر يوم في مهلة الاسبوعين لقيد الولد من ساعة ولادته و لازم اقيده ... اتصل بيا زوجي و قالي انا اتفقت مع الوالد يجيلك و الاسم الي انت تقليله عليه هو هيكتبه و مالكيش دعوه بحد كفايه اني سبتك لوحدك الفتره دي كلها
اااه زوجي حبيبي اداني فرصه لا تعوض انا كده استفردت بالولد ......هسميه ايه.... هسميه ايه
رن الجرس وجاء حمايا العزيز الرجل الطيب ودخل بيا حجرة الصالون ليسمع الاسم على انفراد بينه و بيني بدون اي اعتراضات
ابتسمت في وجهه و بلغته بالاسم
وخرجنا ووالدتي قلقانه من مخي التعبان في اختياري الاسامي الجنان و انا بصراحه قلت اسيبهم على نار شويه لحد ما رجع حماي و في ايده شهادة ميلاد ابني حبيبي "محمد"

يالله قلبي الطيب بقى مش رضيت ازعل حد
وبعدين زوجي دعا ربنا يرزقه بمحمد انزل كلمته الارض يعني