وجاء زئرد الحلقه التاسعه

اكتشف زوجي معنى الابوه الحقه.... فقد أكتشف أن عليه أن ينسى النوم و هو اكتشاف قمت به من قبله
فالاستاذ زئرد – حتى الآن مش بعرف أناديه غير كده – كائن ليلي ينام طول النهار و يستقيظ طوال الليل من الآخر كائن خفافيشي ... حاولت اتباع الكثير من النصائح لايقاظه خلال اليوم- مثل العبي ورا ودانه اقرصي مناخيره... الخ - و لكن لا حياة لمن ينادي ربما فقط يفتح عينيه قليلا و هو ينظر لي بصة
متحاوليش يا ماما و يعود للنوم ثانية – شكراً الولد طلع لخاله( مش السيميائي) تماما في هذه الصفه ساب كل حاجه و ملقاش غير دي يا خدها
اتذكر في زيارة أحد الاقارب اني قمت شويه من جنب زئرد و رجعت لقيت طفل صغير يقوم بمحاولات مستميته لايقاظه عشان يلعب بيه من شد شعر و تقريص خدود و كل اشكال التعذيب الهتلري التي انتهت ببكاء.......
لا مش زئرد
لما الطفل يئس من ان الولد يصحى و جري على امه يطالبها بالمرواح عشان البيبي الي هنا غلس و مش عايز يصحى يلعب بيه
طبعا انا اكتفيت بالعقاب النفسي الي قام بيه زئردي حبيبي و لم اقم بشكوى الولد لأمه
المهم أن زوجي لم يقتع في أول الأمر بكونه قدر لا مفر منه أنه يجب أن نقوم نحن بتعديل نومنا لراحة استاذنا العزيز زئرد و نقلب نحن ايضاً كائنات خفاشيه
عمل حملة اتصالات و اسعه و مزيداً من النصائح و طبعاً بائت كلها بالفشل
وبهذا اتبع زوجي اسلوب جديد تماما و هو التأقلم مع الظروف الجديده و النوم في كافة الظروف و لا اعرف حتى الآن كيف لا يستيقظ ليلا مع السيمفونيات و الغناء الاوبرالي التي يقوم بها ابني العزيز عند الاستيقاظ
واضح ان الكل اتعدى من اخويا في موضوع النوم التقيل الا أنا
اكتشف أخر اكتشفه زوجي وهو أن زئرد في هذه المرحله مالوش لازمه!!!!
هو لا يستطيع أن يلاعبه و زئرد لا يبتسم لدعابات والده فكأنه بيدن في مالطه و ده شئ غاظ ابو زئرد جدااااا خاصة مع انشغالي بزئرد اغلب الوقت و نومي النهار عشان سهر الليالي الي انا فيه ده فهو حس انه مالوش مكان بينا
بس أحلى حاجه أنه لا ييئس لسه كل يوم يقعد جنبه ويكلمه و يهزر و يضحك معاه و يقعد يخطط هيعملوا ايه مع بعض اول ما زئرودتي يكبر و يمشي وكأن زئرد فاهمه لدرجة ان ساعات بغير
اما عن انه يشيله بقى فحدث و لا حرج بقعد اتفرج عليه لو حاول يشيله كأنه عروسه شايله صينية شربات وخايفه لا تتلبخ و تقع منها

تعالوا اتفرجوا دلوقت بقى لهلوبه و بيعرف يسكت زئرد و يضحكه اكتر مني بكتيييييييييير

بس لسه برضه بيخاف يشيله