وجاء زئرد الحلقه السادسه

مشكله كبرى ... اكتشفت اختي الغلباويه ان الولد حطم امالها في انه يبقى توم كروز او حسين فهمي – او على رأي سنكوح شنن يحمل الايزو المصري
كان نفسها يطلع واد مجنن البنات و يروحوا يخطبوه منها بس ده بعينها انا الي هخطبله30:
كان هناك جدال لايااام عديده بينها و بين ماما اذا كا ن الولد عنيه ملونه ولا لا و ابيض و لا لا
لمن لا يعرف الطفل اول ما بيتولد بتبقى عنيه مدخنه لونها رمادي غامق و لا يتضح لونها الا بعد اسبوع او اكثر من الولاده
و لظروف ولادة زئرد السهله جدا كان لونه اول شهر بيتراوح ما بين البنفسجي للازرق ثم الاحمر فمكنش باين هو اسمر او ابيض
و بالتالي بدأت التخمينات مش من اختي بس ده من العيله كلها خاصة الناحيه الي بتحمل عروق تركيه اصيله عشان يشوفوا الولد هيطلع لهم و لا لا خاصة ان ابو زئرد نفسه رغم سماره يحمل ايزو العنين المألونه
لكن زئرودتي اداهم بمبه
فقد اختار ان يكون مصري اصيل:
كنت بحس ان الناس بتيجي تتفرج عليه كأنها بتقلب في بطاطا ثم تبدأالمقارنات بينه وبين اطفال العيله المقاربين له في السن و لو انا اتكلمت ابقى بغير انه مش حلو زي فلان ولو قلت على حد فيهم حلو يبقى بحليه عشان يبان ابني جنبه احلى
بس بصراحه امي كانت بتقوم بصد هجمات التتار عني .... الا لو كانت من حد من طرفها ساعتها تتقلب الايه و يبقى الخنفسه شافت ولادها و القرد في عين امه
اااه بقى غزاااااااااااااااااااااااال
ما هو ابني في نظري الاحلى ....ولي هيقولي غير كده هتقمص بقى
اما عن اختي فكعادتها معي لازم تغيظ فيا فبعد اسبوعين و بعد ان فقدت الامل في احلامها عن توم كروز قالتلي بكل وضوح انا كرهت ابنك و كرهتك معاه مفيش حاجه تفتح النفس كده
وانا اغيظها و اقلها بكره تشوفي ده هيطلع عمر الشريف – هي من كارهي عمر الشريف معرفش ليه – تقوم تتعرفت و تقلي لا ده هيطلعلك عدويه اسم على مسمى


المهم انها تتصل بيا دلوقت و تقلي و حشني العسل الصغنتوت مش هتيجو بقى
اصلها اكتشفت ان لسه فيه امل يحمل ايزو وذلك عند سقوط شعر البطن - الشعر المؤقت(يستمر اول ست شهور للبيبي) - ويطلع شعره الاساسي اصفاريكا ولا بونيكا :

عندما تطير الافيال طبعا