انا وزئرد

انا و زئرد

مبروك انتي حامل .... يااااه بجد مكنتش مصدقه في الاول ... ايه ده هبقى ام هحقق حلم الامومه الي بتحلم بيه كل واحده في الدنيا...
طرت من السعاده و الفرح و شاركني زوجي فرحتي .... و كعادة الازواج و التنبيهات اياها .. حبيبتي اوعي تتحركي من السرير انا هعمل كل حاجه ...
صراحه بشده كان زوجي عند كلمته فعلا سابني راقده في السرير طول اليوم مش بتحرك مش بعمل حاجه ...
زهوة الفرح خلصت ...
هاااه قاعده مستنيه يا ترى هحس بيه امتى .. انا مش حاسه فيه حاجه اتغيرت فيا ... هو انا حامل بجد و لا انا معنديش دم مش حاسه بأي احاسيس امومه من الي كانوا بيحكوا عنها لييييه .. و بعدين هو البيبي مش بيتحرك ليه ... اكلم اختي تضحك و تقولي انت ايه يا بنتي فاكره الامومه دي بتتولد بين يوم و ليله دي بتكبر معاكي يوم بيوم ... اصبري هتفتكري كلامي ده يوم ما تشليه في ايدك ان شاء الله ... مش مقتنعه ..حاسه كده ان انا فيا حاجه غلط
تمر الايام و احساسي بالزهق يتضاعف ... وجوزي مصر افضل نايمه ... واااااء تعبت حاسه ان انا الي طفله رضيعه كنت فرحانه بالدلع في الاول اهو انا الي جيبته لنفسي ...
مرت الشهور الثلاثه الاولى تقريبا من غير احداث ..... نفسي اعرف ازاي في الافلام بيقولوا مراتك حامل على الشهر التالت .... دي اي واحده بتكون عرفت و شبعت معرفه
المهم قررت ان اتحدى الاوامر و اقوم من السرير زهقت .... انا الي جبته لنفسي مكنش عاجبني الدلع.... رجعنا تاني لشغل البيت ... الحمد لله الذي لا يحمد على مكروه سواه .... رجعت لحياتي الاجتماعيه تاني زوجي تعود على الخبر ... و بالتالي لم يعارض ... انا متأكده انه مبسوط بعودتي للملاعب ..... المهم بعودتي للحياه الاجتماعيه بدأت الزيارات تاني و مكالمات التليفون و القعاد على الكومبيوتر ....الخ الخ الخ
المهم اكتشفت ان تقريبا محدش يعرف بالخبر الصاعق و المعجزه الي مكررهاش حد غيري على المستوى العالمي... و لما استغربت ان اقرب اقربائي لا يعلم كان رد والدتي و حماتي ... اصل الحاجات دي بتتنظر ....!!!!! لكن بما ان اول تلت شهور عدو بسلام فقد حان وقت المباهاه
انتشر الخبر انتشار النار في الهشيم ... و انهالت عليا المكالمات ... مبروك و تخبي علينا كل ده يا وحشه .... و يا ترى و لد و لا بنت ... قررتي تسميه ايه.... شوفتيه على السونار.... طالع طويل و لا قصير ... طيب كان حجمه ايه.... و كان ناقص يسألوني لون عنيه ايه
اهم حاجه تتعلمها الست في الحمل الصبر و تكبييير الدمااااغ قوي قوي ....... مش عشان البيبي ... الطفل حمله سهل ...ده غلبان لسه معملش حاجه
انما من كم النصايح التي تنهال عليها ... كلي ده ... متكليش ده ... معقول معملتيش كذا كده البيبي هيطلع في وشه وحمه ...... لازم تكلي كتير انت بتاكلي لتنين... متزوديش في الاكل لا الاكل يكبس على الواد يفطسه... لازم تنامي بدري عشان الواد ميطلعش براسين...... متشربيش لبن قبل ما التلت شهور يعدو لحسن البيبي تطلع راسه كبيره......... يا ريت يطلع مكبر دماغه ده الي بسمعه ينقط الصراحه.... فيها نصايح مفيده نعم و لكن بها كثير من الفتي المتين قوي بر ضه
المهم السؤال المتكرر دائما هتسميه ايه و كل واحد يقترح اسم و الناس تزعل لو بان عليا ان مش عجبني الاسم
كان الاتفاق بيني و بين زوجي ان هنختار اسم محايد ... لا يتواجد عنده في العيله و لا يتواجد عندي .... عشان نضمن ان متحصلش حرب الفراوله ... و نضمن الحياد التام
لكن بصراحه كنت محتاره في اختيار الاسم كان عجبني اسامي عجيبه بصراحه لمجرد ان نفسي يكون اسم ابني او بنتي مميز و كأنه احمد زويل القادم او الخنثاء في زمانها ... تعبت و احترت و كل ما اقول اسم ميعجبش زوجي و كل ما زوجي يقول اسم اقله عادي مش مميز و مرت الايام و انا مش لاقيه الاسم.......خلاص هسيبه من غير اسم... ايه ده ...اوف انا زهقت من الحيره ... لما هيتولد اسمه هيجي معاه ... . وتطور الكيان داخلي ... احسست بيه داخلي...انا الي كنت بقول عليه طيب تقريبا اختار مكان الاولمبياد القادمه داخلي فهو يتدرب يوميا على التايكوندو والجودو و المصارعه الحره.... شكلك طالع مفتري لمين يا ولد ...... يا ترى انت فعلا ولد و لا بنت ... يا رب بس تطلع انسان كويس....معافى دين و دنيا .... ولكني احتاج ان انادي هذا الكيان بداخلي باسم .. ليس لالحاح من حولي اني ارسى على اسم و اخلصهم .... ..... انا احتاج لهذا ... الاسم ترجمه لوجود الانسان على الارض ... انا احس بهذا الانسان... احس بوجوده.... انه داخلي يمشي من خلالي يلعب بداخلي و يبكي و يفرح .. انا اتكلم معه و هو يرد عليا بربتاته الرقيقه !!! .... انا احب هذا الكيان ....... نعم انا احب زئرد .... هو ابني زئرد الصغير الي مطلع عيني و يصحيني نص الليل على حركات طفولته البريئه .... اشتاق اليك يا زئرد و اشتاق ان اراك .. لم اعرف اسمك بعد ولكن الان يكفيني زئرد.... بحبك يا زئرد