الحلقه العاشره

النهارده اول يوم يزور فيه زئرد جدته ... نتيجة ظروف ما اتـأخرت الزياره دي شويه ...
بصراحه انا بحب حماتي ما شاء الله ست طيبه و عمري ما زعلت منها يمكن كمان لقلة احتكاكي بها نتيجة ظروف السفر معرفش بالظبط
المهم كان اعمام الولد و عماته اجتمعوا لرؤيته و تديشينه
دائما كنت معروفه بتكبير الدماغ اما في هذه الزياره اكتشفت في نفس صفات جديده
فقد فوجئت حماتي تقول لي بعد السلام و التحيات هو الولد خاسس كده ليه هو انت مش مهتمه بأكله
ااه واضح ان شغل الحموات هيشتغل و لا ايه ... هي بتقول عليا ان انا مهمله لزئرد و لا ايه و ابتدى مخ الستات الصغير يشتغل و يفسر الكلام مليووون تفسير
وزاد الطين بله انها ابتدت لسته طويله من النصااااائح عن كيفيه اطعام زئرد و كمان زوجي بيوافقها و لو نطقت ان الدكتوره بتقول كذا ... تبتدي الاعتراضات ... و هو احنا كنا بنروح لدكاتره اصلا غير لو حد بعد الشر تعب ..هو الاكل كمان محتاج كلام دكتور
قلت اسكتي و طولي بالك يا ام زئرد وانا نويت و النيه لله ان النهارده مش هيعدي بسلام بيني و بين زوجي اول ما نروح البيت هاطالب برفع ايد اي حد عن زئرودتي حبيبيتي ...كله الا انهم يقولوا مش مهتمه بيه قال
زاد و غطى بقى ان قامت احدى الزائرات لبيت حماتي في الوقت ده- قال يعني حبكت الزياره دلوقت ماهي عارفه انه تجمع عائلي- بالتعليق على شكله
فبعد فحص و تمحيص و تقليب للواد زئرد و انا بقول في سري ان الله مع الصابرين لما نشوف اخرتها ابتدت لسته من النقد اللاذع لزئرد الي لسه مطلعش من البيضه و معملش حاجه لحد
هو الحقيقه زئردي حبيبي في حد ذاته متوصاش !!!!! فقد اعطى حتة دين تكشيره عمري ما شفتها على عيل صغير و كأنه فاهم الكلام و بيرد عليه حتى ان الجميع ضحك و احرجت الضيفه من تكشيرة الولد لها
وهنا بدأ مدفعي الرشاش و بلاش اقول الي حصل بقى عشان متزعلوش مني
قررت ان اخد هدنه قصيره و ازور ماما في طريقي لبيتي

ماما الحقيقه انقذت زوجي بدون ان تعلم من المعركه الي كنت ناوياله عليها
فقد فوجئت اول ما شفته بكلمة " هو الواد خاسس كده ليه ..حرام عليكي انت بطلتي توكليه من ساعة ما سبتينا و لا ايه " ثم لسته طوييييييله عريضه من النصائح
نفس اللسته تقريبا
واضح ان كل الجدات بتشوف بناتها مهملات في حق احفادهن العزاز على قلوبهن اكتر من بناتهم نفسهم

مااااشي مسيري تقعي في ايدي يا مرات ابني و اقلك نفس اللسته